ଭୁବନେଶ୍ୱର:ଭାରତୀୟ ରିଜର୍ଭ ବ୍ୟାଙ୍କ (RBI) ପକ୍ଷରୁ ପ୍ରକାଶିତ “ଭାରତରେ ବ୍ୟାଙ୍କିଙ୍ଗ ଧାରା ଓ ପ୍ରଗତି ୨୦୨୪–୨୦୨୫” ରିପୋର୍ଟକୁ ନେଇ ବର୍ତ୍ତମାନ ବିଭିନ୍ନ ପ୍ରଶ୍ନ ଓ ସନ୍ଦେହ ପ୍ରକାଶ ପାଇଛି।ରିପୋର୍ଟ ଅନୁସାରେ, ଦେଶର ଗ୍ରାମୀଣ ଋଣ ବ୍ୟବସ୍ଥାର ମୂଳ ଆଧାର ଭାବେ ଗଣ୍ୟ ରାଜ୍ୟ ସମବାୟ ବ୍ୟାଙ୍କ ଓ ଜିଲ୍ଲା କେନ୍ଦ୍ର ସମବାୟ ବ୍ୟାଙ୍କମାନେ ୨୦୨୪–୨୦୨୫ ଆର୍ଥିକ ବର୍ଷରେ ସ୍ଥିର ବୃଦ୍ଧି ରେକର୍ଡ କରିଛନ୍ତି। ନାବାର୍ଡର ସହାୟତାରେ ରାଜ୍ୟ ସମବାୟ ବ୍ୟାଙ୍କମାନଙ୍କର ଋଣ ବୃଦ୍ଧି ଦ୍ରୁତ ଗତି ନେଇଥିବା ବେଳେ, ଜିଲ୍ଲା କେନ୍ଦ୍ର ସମବାୟ ବ୍ୟାଙ୍କମାନେ ତାଙ୍କର ବିସ୍ତୃତ ଗ୍ରାମୀଣ ଶାଖା ନେଟୱର୍କ ମାଧ୍ୟମରେ ଜମା ସଂଗ୍ରହ ଓ ଋଣ ପହଞ୍ଚକୁ ଅଧିକ ସୁଦୃଢ଼ କରିଥିବା ଉଲ୍ଲେଖ ଅଛି।ରିପୋର୍ଟ ଅନୁସାରେ, ରାଜ୍ୟ ସମବାୟ ବ୍ୟାଙ୍କମାନଙ୍କର ସମୁଦାୟ ଋଣ ଅଗ୍ରଗତି ୩.୨୦ ଲକ୍ଷ କୋଟି ଟଙ୍କାକୁ ପହଞ୍ଚିଥିବା ବେଳେ, ତାହାର ୪୩.୪ ପ୍ରତିଶତ କୃଷି ଋଣ ରୂପେ ରହିଛି। ସେହିପରି, ଜିଲ୍ଲା କେନ୍ଦ୍ର ସମବାୟ ବ୍ୟାଙ୍କମାନଙ୍କର ସମ୍ପତ୍ତି ଗୁଣବତ୍ତା ପଞ୍ଚମ ଲଗାତାର ବର୍ଷ ପାଇଁ ଉନ୍ନତି ପାଇଥିବା ଓ ଏହା ରାଜ୍ୟ ସମବାୟ ବ୍ୟାଙ୍କ ତୁଳନାରେ ଅଧିକ ଭଲ ବୋଲି କୁହାଯାଇଛି।ସମଗ୍ର ଭାବେ, ୨୦୨୪–୨୦୨୫ ମସିହାରେ ରାଜ୍ୟ ଓ ଜିଲ୍ଲା ସମବାୟ ବ୍ୟାଙ୍କମାନେ ଜମା ଓ ଋଣରେ ସ୍ଥିର ବୃଦ୍ଧି ସହ ସମ୍ପତ୍ତି ଗୁଣବତ୍ତାରେ ଲଗାତାର ଉନ୍ନତି ହୋଇଥିବା ଦାବି କରାଯାଇଛି।ତେବେ ପ୍ରଶ୍ନ ଉଠୁଛି—ରିପୋର୍ଟରେ ଉଲ୍ଲେଖ ହୋଇଥିବା ତଥ୍ୟ କେତେଦୂର ସତ? ରାଜ୍ୟରେ ଥିବା ଏକ ସମବାୟ ବ୍ୟାଙ୍କ, ଯାହା ସମବାୟ ବିଭାଗ ଅଧୀନରେ ରହିଛି, ସେହି ସମବାୟ ବିଭାଗର ବ୍ୟାଙ୍କ ଖାତା ଅନ୍ୟ ବ୍ୟାଙ୍କରେ କାହିଁକି ରହିଛି? ଚଳିତ ବର୍ଷ ରାଜ୍ୟ ସମବାୟ ବ୍ୟାଙ୍କରୁ କେତେ ଟଙ୍କା ଋଣ ବଣ୍ଟନ କରାଯାଇଛି? କର୍ମଚାରୀମାନେ କେତେ ଦରମା ପାଉଛନ୍ତି? ପ୍ରତିବର୍ଷ ନାବାର୍ଡ ପକ୍ଷରୁ କେତେ ଅର୍ଥ ସହାୟତା ଦିଆଯାଉଛି ଓ ସେହି ଅର୍ଥର ସଠିକ୍ ବିନିଯୋଗ ହେଉଛି କି?ଏହି ସମସ୍ତ ପ୍ରଶ୍ନକୁ ନେଇ RTI ମାଧ୍ୟମରେ ତଥ୍ୟ ମଗାଯାଇଥିବା ଖବର ମିଳିଛି। ସମଗ୍ର ପରିସ୍ଥିତିକୁ ଦୃଷ୍ଟିରେ ରଖିଲେ, ଭାରତୀୟ ରିଜର୍ଭ ବ୍ୟାଙ୍କର ଏହି ରିପୋର୍ଟ ଉପରେ ସନ୍ଦେହ ସୃଷ୍ଟି ହେଉଛି।
