ଭୁବନେଶ୍ୱର:ମାର୍ଚ୍ଚ ୩୧ ତାରିଖରେ ଧାନ କ୍ରୟ ଅବଧି ଶେଷ ହୋଇଥିଲେ ମଧ୍ୟ, ଚାଷୀଙ୍କ ସୁବିଧାକୁ ଦୃଷ୍ଟିରେ ରଖି ରାଜ୍ୟ ସରକାର ୭ ଦିନର ସମୟ ବୃଦ୍ଧି କରିଛନ୍ତି। ଏହା ଫଳରେ ଯେଉଁ ଚାଷୀମାନେ ଏପର୍ଯ୍ୟନ୍ତ ଧାନ ବିକ୍ରି କରିପାରିନାହାନ୍ତି, ସେମାନେ ଏହି ଅତିରିକ୍ତ ସମୟ ଭିତରେ ନିଜ ଧାନ ବିକ୍ରି କରିପାରିବେ।ସମବାୟ ମନ୍ତ୍ରୀ ପ୍ରଦୀପ ବଳ ସାମନ୍ତ ଏହା ସମ୍ପର୍କରେ କହିଛନ୍ତି ଯେ, ମିଲ୍ଗୁଡ଼ିକରେ ଜାଗା ଅଭାବ ହେତୁ ଧାନ କ୍ରୟ ପ୍ରକ୍ରିୟାରେ କିଛି ବିଳମ୍ବ ଘଟିଥିଲା। କିନ୍ତୁ ସରକାର ଏହାକୁ ଗମ୍ଭୀରତାର ସହିତ ନେଇ ଅତିରିକ୍ତ ସମୟ ଦେଇଛନ୍ତି, ଯାହାଦ୍ୱାରା ଜଣେ ବି ଚାଷୀ ଅସୁବିଧାରେ ପଡ଼ିବେ ନାହିଁ।ରାଜ୍ୟରେ ଯେତେ ଧାନ ରହିଛି, ସରକାର ସମସ୍ତ ଧାନ କ୍ରୟ କରିବେ। କୌଣସି ଚାଷୀଙ୍କ ଧାନ ଏଥିରୁ ବଞ୍ଚିତ ହେବ ନାହିଁ ବୋଲି ସରକାର ପ୍ରତିବଦ୍ଧ ଅଛନ୍ତି।ଏପର୍ଯ୍ୟନ୍ତ ପ୍ରାୟ ୭୭ ଲକ୍ଷ ମେଟ୍ରିକ୍ ଟନ ଧାନ କ୍ରୟ ହୋଇଥିବା ବେଳେ, ୧୮ ଲକ୍ଷ ୬୪ ହଜାର ଚାଷୀ ନିଜ ଉତ୍ପାଦନ ଧାନ ବିକ୍ରି କରିପାରିଛନ୍ତି। ଏହାକୁ ରାଜ୍ୟର କୃଷି କ୍ଷେତ୍ର ପାଇଁ ଏକ ବଡ଼ ସଫଳତା ଭାବେ ଦେଖାଯାଉଛି। ସମବାୟ ମନ୍ତ୍ରୀ ପ୍ରଦୀପ ବଳ ସାମନ୍ତ ଏହି ସୂଚନା ଦେଇଛନ୍ତି।
