ଭୁବନେଶ୍ୱର:ରାଜ୍ୟ ସମବାୟ କ୍ଷେତ୍ରରେ ଦକ୍ଷ ମାନବ ସମ୍ବଳ ସୃଷ୍ଟି ଏବଂ ଶିଳ୍ପ ଭିତ୍ତିଭୂମିର ପୁନରୁଦ୍ଧାର ଦିଗରେ ଆଜି ଏକ ଯୁଗାନ୍ତକାରୀ ପଦକ୍ଷେପ ନିଆଯାଇଛି। ମାନ୍ୟବର କେନ୍ଦ୍ର ଗୃହ ଏବଂ ସମବାୟ ମନ୍ତ୍ରୀ ଶ୍ରୀ ଅମିତ ଶାହଙ୍କ ଗରିମାମୟ ଉପସ୍ଥିତିରେ ଓୟୁଏଟି କ୍ୟାମ୍ପସରେ ‘ତ୍ରିଭୁବନ ସମବାୟ ବିଶ୍ୱବିଦ୍ୟାଳୟ’ ର ସ୍କୁଲ ପ୍ରତିଷ୍ଠା ଏବଂ ବହୁ ପ୍ରତୀକ୍ଷିତ ବଡ଼ମ୍ବା ସମବାୟ ଚିନି ଶିଳ୍ପ ର ପୁନରୁଦ୍ଧାର ପାଇଁ ପୃଥକ ପୃଥକ ବୁଝାମଣା ପତ୍ର (MoU) ସ୍ୱାକ୍ଷରିତ ହୋଇଛି।ଏହି ପଦକ୍ଷେପ ମାଧ୍ୟମରେ ସମବାୟ କ୍ଷେତ୍ରରେ ଆଧୁନିକ ଶିକ୍ଷା, ପ୍ରଶିକ୍ଷଣ ଏବଂ ଗବେଷଣାର ନୂଆ ଦ୍ୱାର ଖୋଲିବା ସହିତ ରାଜ୍ୟର ଅବହେଳିତ ସମବାୟ ଶିଳ୍ପଗୁଡ଼ିକୁ ପୁନରୁଜ୍ଜୀବିତ କରିବାରେ ଏହା ଏକ ମାଇଲସ୍ଟୋନ୍ ଭାବେ ପରିଗଣିତ ହେଉଛି। ତ୍ରିଭୁବନ ସମବାୟ ବିଶ୍ୱବିଦ୍ୟାଳୟ ସ୍ଥାପନ ଦ୍ୱାରା ଯୁବପିଢ଼ୀଙ୍କୁ ସମବାୟ ପରିଚାଳନା, ଆର୍ଥିକ ପ୍ରଶାସନ ଓ ଶିଳ୍ପ ବିକାଶ ସମ୍ବନ୍ଧୀୟ ଦକ୍ଷତାରେ ପ୍ରଶିକ୍ଷିତ କରାଯିବ।ସେହିପରି ବଡ଼ମ୍ବା ସମବାୟ ଚିନି ଶିଳ୍ପର ପୁନରୁଦ୍ଧାର ଦ୍ୱାରା ସ୍ଥାନୀୟ କୃଷକ ଓ ଅଞ୍ଚଳର ଅର୍ଥନୈତିକ କାର୍ଯ୍ୟକଳାପକୁ ନୂଆ ଗତି ମିଳିବ ବୋଲି ଆଶା କରାଯାଉଛି।ଏହି ଦୁଇଟି ପଦକ୍ଷେପ ରାଜ୍ୟର ସମବାୟ ବ୍ୟବସ୍ଥାକୁ ସୁଦୃଢ଼ କରିବା ସହ ଆଗାମୀ ଦିନରେ କୃଷକ, ଯୁବକ ଓ ସମବାୟ ସଂସ୍ଥାମାନଙ୍କ ପାଇଁ ନୂତନ ସୁଯୋଗ ସୃଷ୍ଟି କରିବ ବୋଲି ମତ ପ୍ରକାଶ ପାଇଛି।
